បារាំង៖ ការិយាល័យរដ្ឋអាជ្ញាក្រុងប៉ារីសបានឱ្យដឹងនៅថ្ងៃទី០៩ ខែកក្កដានេះថា ការិយាល័យរដ្ឋអាជ្ញាបានចាប់ផ្តើមការស៊ើបអង្កេតបឋមលើការចោទប្រកាន់ពីបទផ្តល់ហិរញ្ញប្បទានខុសច្បាប់នៃយុទ្ធនាការឃោសនាបោះឆ្នោតរបស់មេដឹកនាំគណបក្សស្តាំនិយមជាតិ (RN) លោកស្រី Marine Le Pen ក្នុងការប្រជែងតំណែងប្រធានាធិបតីកាលពីឆ្នាំ២០២២ ដែលកាលណោះលោកស្រីបានរងបរាជ័យទល់នឹងលោក Emmanuel Macron។

ការិយាល័យរដ្ឋអាជ្ញាទីក្រុងប៉ារីសបញ្ជាក់ថា ការស៊ើបអង្កេតត្រូវបានបើកកាលពីថ្ងៃទី២ ខែកក្កដាកន្លងទៅ ដោយផ្អែកតាមរបាយការណ៍ឆ្នាំ២០២៣ របស់គណៈគណៈកម្មការជាតិស្តីពីគណនីយុទ្ធនាការ និងហិរញ្ញប្បទាននយោបាយ (CNCCFP) ដែលពិនិត្យលើការចំណាយ និងការផ្តល់មូលនិធិសម្រាប់យុទ្ធនាការឃោសនាបោះឆ្នោតរបស់បេក្ខជននីមួយៗ។ បើតាមរបាយការណ៍នេះបញ្ជាក់ថា ក្រុមការងារបានពិនិត្យមើលលើការចោទប្រកាន់អំពីការកិបកេង ក្លែងបន្លំ និងបានបញ្ជាក់ថាបេក្ខជនម្នាក់ក្នុងយុទ្ធនាការនៃការឃោសនាបោះឆ្នោតនេះបានយល់ព្រមលើការទទួលប្រាក់កម្ចី។

លោកស្រី Marine Le Pen និងគណបក្សស្តាំនិយមជាតិ (RN) របស់លោកស្រីបានចេញមកបដិសេធជុំវិញការចោទប្រកាន់ និងស៊ើបអង្កេតនេះ ដោយលោកស្រីអះអាងថាមិន​បាន​ប្រព្រឹត្ត​អំពើខុសឆ្គងណាមួយ​ទាក់ទង​នឹង​ហិរញ្ញប្បទាន​សម្រាប់​យុទ្ធនាការឃោសនាបោះឆ្នោតឡើយ។ ដោយឡែក គណបក្សស្តាំនិយមជាតិ (National Rally) មិនទាន់មានការបំភ្លឺបន្ថែមណាមួយជុំវិញករណីនេះឡើយ។ 

ដោយឡែក លោកស្រី Marine Le Pen នឹងត្រូវចូលរួមសវនាការមួយ​នៅ​ចុង​ឆ្នាំ​នេះ​ជាមួយ​មនុស្ស ២៧ នាក់​ផ្សេង​ទៀត​ជុំវិញ​ការ​ចោទ​ប្រកាន់​ពី​ការ​ប្រើ​ប្រាស់​ថវិកា​របស់​សហភាព​អឺរ៉ុប​។ ការស៊ើបអង្កេតលើករណីនេះធ្វើឡើងកាលពីឆ្នាំ២០១៦ ទៅលើតម្លាភាពនៃការប្រើប្រាស់កញ្ចប់ថវិការបស់សហភាពអឺរ៉ុបពាក់ព័ន្ធនឹងនិរន្តភាពនៃគណបក្សនយោបាយរបស់លោកស្រីឬយ៉ាងណា។ 

គួរបញ្ជាក់ថា ក្នុងនាមជាមេដឹកនាំមួយរូបនៃគណបក្សស្តាំនិយម (RN) លោកស្រី Marine Le Pen ធ្លាប់បានឈរឈ្មោះប្រជែងតំណែងប្រធានាធិបតីទល់នឹងលោក Emmanuel Macron ពីរលើករួចមកហើយកាលពីឆ្នាំ២០១៧ និង ២០២២ ដែលគេរំពឹងថាលោកស្រីទំនងជានឹងបន្តប្រជែងតំណែងប្រធានាធិបតីបារាំងសាជាថ្មីម្តងទៀតនៅឆ្នាំ២០២៧ ខាងមុខនេះ៕